IуэхуфIыр жыжьэ нос

 Къэбэрдей-Балъкъэрым IэнатIэ куэду зэхэт и щIалэгъуалэ центрым и лэжьакIуэ Къарэ Ратмир псапэ зыпылъ Iуэху куэдым я жэрдэмщIа­кIуэщ.

 Ратмир и нэIэм щIэту лажьэхэм цыхэкI щащэу Налшык и «Долинск» хьэблэм дэт «бжэн бэ­зэрым» сату щызыщI ­ныбжь зиIэ нанэхэм ящэ хьэпшыпхэр къащэху (цыджанэхэр, цылъэпэдхэр, цым къыхэщIыкIа пыIэ­хэр), ахэр зэкIуэцIалъхьэри, жьы хъуа цIыху дэIэпыкъуэгъуншэхэр щапIыжу Урысейм и адрей щIыналъэхэм щыIэхэм ирагъэхь. Хьэпшыпхэм къадэкIуэу, абы щIыгъущ  «Налшык къикI гуапагъэ», жиIэу зытет тхылъымпIэ дахэрэ Къэшэж Иннэ и усэ тхылърэ. Къэшэжым и усэ тхылъхэми мыхьэнэшхуэ яIэщ. Иннэ и дэтхэнэ зы усэ сатырри гъэнщIащ адыгэ лъэпкъым хуиIа гурыщIэ къабзэмкIэ, ди щIыналъэм и дахагъэмкIэ, ди цIыхухэм яхэлъ ­гуапагъэмкIэ.
 ПсапащIэхэм я япэ посылкэр, килограммий хъур, Подмосковьем, абы къы­кIэлъыкIуэр Архангельск яутIыпщащ. Гуапагъэмрэ гулъытэмрэ кърикIуам къызэгъэпэща­кIуэхэр куэд­рэ пэплъэн ­хуей хъуа­къым. Сыбыр щыIэ псапащIэ центрым и уна­фэ­щIым хъуэхъу псалъэ гуапэкIэ закъыхуигъэзащ апхуэдэ гукъэкI зыщIа щIалэмрэ абы и лэжьэгъу­хэмрэ. «Гуапэ дыдэ тщыхъуащ фи ­тыгъэр. Ди щIыпIэмкIэ цыхэкI ущрихьэлIэркым, синтетикэ мыхъумэ. Ди цIыхухэм я деж къэс за­къуэтIакъуэри апхуэдизкIэ лъапсейщи, къэпщэхуну упэлъэщыр­къым», - жи­Iащ абы.
 Ратмир кърихьэжьа Iуэхум и фIыгъэкIэ ныбжь зиIэхэм я хьэпшыпыр псынщIэу яща мэхъу, ар зезыхьэнухэм я дежкIи ­уасэ зимыIэщ, къинэ­мы­щIауэ, ди республикэм щыпсэухэм ябгъэдэлъ ­гуапагъэр къэрал псом къыщащIэ.

Жанхъуэт Зузэ.

Свежие номера газет Адыгэ псалъэ


19.08.2019
15.08.2019
14.08.2019
13.08.2019