Кавказ Ищхъэрэ федеральнэ округым и Социально-экономикэ зыужьыныгъэм и стратегиер дызэрыт илъэсым къриубыдэу къащтэнущ

 Петербург щызэхэта экономикэ зэхыхьэшхуэм хиу­быдэу Урысей Федерацэм Кавказ Ищхъэрэм и IуэхухэмкIэ и министр Чеботарёв Сергей Кавказ ­Ищхъэрэ федеральнэ округым и щIыналъэхэм я Iэтащхьэхэм я зэIущIэ иригъэкIуэкIащ. Абы хэтащ ­КъБР-м и Iэтащхьэм и къалэнхэр пIалъэкIэ зыгъэзащIэ КIуэкIуэ Казбек.
 Урысей Федерацэм и щIыналъэу Кавказ Ищхъэрэ федеральнэ округым хиубыдэхэм я социально-экономикэ зыужьыныгъэм теухуа зэIущIэр къыщызэ­Iуихым Чеботарёв Сергей зэрыжиIамкIэ, Урысейм Кавказ Ищхъэрэм и IуэхухэмкIэ и министерствэм къы­пэщытщ Кавказ Ищхъэрэ федеральнэ округым и Со­циально-экономикэ зыужьыныгъэм и стратегием дызэрыт илъэсым къриубыдэу щIэуэ хэплъэжын ­хуейуэ.
 Стратегием хиубыдэн хуейщ 2035 гъэм нэсыху Кавказ Ищхъэрэ федеральнэ округым и зыужьыныгъэм и унэтIыныгъэ нэхъыщхьэхэр. Ар хуэунэтIауэ щытынущ щIыналъэм езым къызэригъэпэщ хэхъуэхэр нэхъыбэ щIыным, социально-экономикэ зыужьыныгъэм пыщIа бжыгъэхэр къэралым ику иту щыIэхэм нэгъэсыным, щIыналъэ зэхуаку проектхэр гъэзэщIэным, инфраструктурэм ехьэлIа лъэпощхьэпохэр къызэнэкIыным.
Стратегием и Iыхьэ псоми убзыхуауэ тепсэлъыхьын папщIэ Урысейм Кавказ Ищхъэрэм и IуэхухэмкIэ и ­министерствэм къыщызэрагъэпэщ властым и федеральнэ, щIыналъэ органхэм я лэжьакIуэхэр, эксперт, щIэ­ныгъэ зэгухьэныгъэхэм я лIыкIуэхэр зыхэт лэ­жьакIуэ гуп.
 Дызэрыт илъэсым и мазаем къащтауэ щытащ 2025 гъэм нэсыху къриубыдэ лъэхъэнэм Урысей Федерацэм и щIыналъэ зыужьыныгъэм и стратегие. Документым къыщыгъэлъэгъуащ Кавказ Ищхъэрэ федерал­ь­н­э округым и субъектхэм я зыужьыныгъэм и унэ­тIы­ныгъэ­ нэхъыщхьэхэр. Стратегиер зыхуэунэтIар цIыхухэм я псэукIэм и лъэныкъуэкIэ щIыналъэхэм я зэщхьэщыкIыныгъэхэр гъэмэщIэнырщ, экономикэ, технологие зыужьыныгъэхэр щIэгъэпсынщIэнырщ.

КъБР-м и Iэтащхьэмрэ Правительствэмрэ я пресс-IуэхущIапIэ.

Свежие номера газет Адыгэ псалъэ


24.06.2019
20.06.2019
18.06.2019
17.06.2019