Темыркъан Залымджэрий и япэ пшыхь

Налшык дэт Къэрал киноконцерт гъэлъэгъуапIэм иджыблагъэ ще­кIуэкIащ пшынэр Iэзэу зыгъэбзэрабзэ адыгэ щIалэ Темыркъан Залымджэрий и япэ концерт.
Залымджэрий Гнесинхэ я цIэр зезыхьэ Му­зы­кэ академием и еплIанэ курсым що­джэ икIи урысейпсо, дунейпсо зэпеуэхэм мызэ-мытIэу пашэныгъэр щиубыдащ. Къы­хэгъэщыпхъэщ мы щIалэм и Iэзагъым хэпщIыкIыу зэрыхи­гъахъуэр. Абы и фIыгъэщ ар Москва, Къэзан, Уфа, Южноуральск, Нал­шык, Черкесск, Мейкъуапэ, Псыхуа­бэ, Дон Iус Ростов къалэхэм къыщызэрагъэ­пэщ концертхэм щIэх-щIэхыурэ зэ­рырагъэблагъэр. Те­мыркъан Юрэ и щIыхькIэ илъэс къэс ирагъэкIуэкI фестивалым хэтщ.
Залымджэрий курыт еджапIэм  щIэсу музыкэм и дуней телъыджэм дихьэхат. Абы гу лъызыта и анэ Аллэ щIалэр Нарткъалэ музыкэм щыхурагъаджэу дэт еджапIэм ишат. Школым и егъэджакIуэ Бажэ Марие Темыр­къаным къыхузэIуихат лъэпкъ макъа­мэм и дахагъэ псори. Залымджэрий пшынэм Iэзэу ­еуэм и мыза­къуэу, езыми макъамэ еус. Мыгувэу абы и аль­бом щхьэхуэ дунейм къытехьэнущ.
Залымджэрий ныбжькIэ щIалэми, ехъулIэныгъэ мымащIэ иIэщ. Абыхэм ящыщщ 2016 гъэм екIуэкIа «Дельфийские игры» зэхыхьэм дыщэ ме­даль къызэрыщихьар, иужькIэ къэ­ралым музыкэмкIэ и еджапIэ нэхъыфIхэм ящыщу къалъытэ, Гне­синхэ я цIэр зезыхьэ академием­ зэ­рыщIэтIысхьар. Залымджэрий ще­джэр профессор цIэрыIуэ Гунин Виталий и классырщ. 
Налшык дэт киноконцерт гъэлъэгъуапIэм Темыркъаным къыщызэригъэпэща пшыхьыр икъукIэ гуапэ ­хъуат. Макъамэм бзэ, лъэпкъ зэхэгъэж зэримыщIэм, цIыхупсэм тыншу­ зэрылъэIэсыфым и щыхьэтт ар. Залымджэрий игъэIу пшынэр зэ­мы­фэгъуу зэтепщIыкIырт, дуней псом къыщацIыху классикэми лъэпкъ макъамэхэми ящIэлъ IэфIыр пэшым щIэсхэм я деж нихьэсыфрэ гупсысэ къудамэхэр гущIэм щызэригъэ­тIэ­пIыкIырт. Хуабжьу гунэст профессор Семёнов Вячеслав елэжьыжауэ, Уильямс и IэдакъэщIэкIыу «Незабвенное» зыфIаща композицэр. Мо­царт, Ахановым, Римский-Корсаковым къагъэщIа дахагъэмрэ абыхэм зэманыр пэмылъэщу хэлъ мэгъу къарумрэ къызэхуэсахэр щыхьэт техъуэну Iэмал яIащ. 
Лъэпкъым и къэкIуэнур дахэу уэзы­гъэлъагъу щIэблэ узыншэхэм ящыщщ Темыркъан Залымджэрий.Тхьэм иригъэфIакIуэ! 

Тэрчокъуэ Дисэ. Сурэтыр Къарей Элинэ трихащ.

Свежие номера газет Адыгэ псалъэ


01.04.2020
30.03.2020
27.03.2020
25.03.2020