«Аиссе» фильмым и трейлерыр къыдэкIащ

АР-м, КъБР-м, КъШР-м я цIыхубэ тхакIуэ МэшбащIэ Исхьэкъ и Iэдакъэ къыщIэкIа «Аиссе» тхыдэ рома­нымкIэ полнометражнэ художес­твеннэ фильм трахауэ къыдэкIыным зэрыхуагъэхьэзырым теухуа хъыбар мызэ-мытIэу ди газетым тетащ. 
ЩэкIуэгъуэ мазэм и кIэхэм утыку кърахьэну фильмым и трейлерыр мы махуэхэм къыдэкIауэ интернетым щызэIэпах. 
Иджы нэрылъагъу тщыхъуащ Адыгэ Республикэм, Санкт-Петербург къалэм, хамэ къэралхэм щытраха сценэхэм щыщ теплъэгъуэхэр. 
Фильмым роль нэхъыщхьэр щызыгъэзащIэр къэбэрдей пщащэ, Нарткъалэ къыщалъхуа, Москва дэт «Го-голь-центр» театрым и актрисэ Мамрэш Светланэщ, Аиссе щы­цIыкIум и ролыр игъэзэщIащ ЕхъулIэ Даянэ.
«Аиссе»-м йолэжь урысей кинокомпаниеу тIу - «Орёл», «Ракурс». Режиссёр нэхъыщхьэр Урысей Федерацэм гъуазджэхэмкIэ щIыхь зиIэ и лэжьакIуэ, кинорежиссёр цIэрыIуэ Муратов Александрщ. 
Кином шевалье Д,Эди и ролыр щигъэзэщIащ Дряблов Евгений,   Ермин Владимир граф де Ферриолу джэ­гуащ, Добровольская Евгение (мадам де Ферриоль), Лазарев Алек­сандр (герцог Орлеанский), Беляев Юрий (Мальтийскэ орденым и лIы­кIуэщ), Ткаченкэ Артём (герцог Орлеанский и дэIэпы­къуэгъущ). 
Аиссе и адэшхуэ-анэшхуэу джэ­гуащ Урысей Федерацэм щIыхь зиIэ и артист Зыхьэ Заурбийрэ Адыгэ Республикэм и цIыхубэ артисткэ Уджыхъу Мариетрэ, фильмым хэтащ Адыгейм и лъэпкъ театрым и актёрхэмрэ «Налмэс» къэрал ансамблым и къэфакIуэхэмрэ. 
Фильмым и продюсер нэхъыщхьэр Адыгейм и президенту щыта Щэумэн Хьэзрэтщ.
МэшбащIэ Исхьэкъ и романым ­лъабжьэ хуэхъуар къэхъуа Iуэху­гъуэщ, зытеухуари адыгэ пщащэм и гъащIэм и къекIуэкIыкIа къы­зэ­рымыкIуэрщ. 
«Аиссе»-р япэу экранымкIэ щэкIуэгъуэ, дыгъэгъазэ мазэхэм щалъагъунущ Адыгейм, Къэбэрдей-Балъкъэ­рым, Къэрэшей-Шэрджэсым щып­сэухэм. 

НэщIэпыджэ Замирэ.

Свежие номера газет Адыгэ псалъэ


21.10.2020
19.10.2020
16.10.2020
14.10.2020