Нарт пшыналъэхэм ящIэлъ макъамэр

«Принт-центр» тедзапIэм иджы­благъэ къыщыдэкIащ гъуазджэ щIэныгъэхэм я доктор, Урысейм и композиторхэм я зэгухьэныгъэмрэ ЩIДАА-мрэ хэт, КъБР-м щэнхабзэмкIэ щIыхь зиIэ и лэжьакIуэ Ащхъуэт Беслъэн и «Музыкальная нартиада» тхылъыр. 
И цIэм къызэрыджиIэщи, тхылъыр топсэлъыхь нарт пшыналъэхэм ящIэт макъамэхэм. Иджыри къэс нарт эпосым елэжьа щIэныгъэлIхэм я гулъытэр нэхъ зытеухуауэ щытар езы IуэрыIуатэм ихуа тхыгъэхэрт, абыхэм я тхыдэрт, я бзэрт, ахэр зэпхьэлIэ хъуну лъэхъэнэмрэ къы­зыбгъэдэкIынкIи хъуну лъэпкъхэмрэт. А зэдауэхэм куууэ яхэмыхьэу, Ащхъуэ­тым и тхылъыщIэм нарт эпосыр кавказ лъэпкъ зыбжанэм къызэрагъэпэща дунейпсо хъугъуэ­фIыгъуэу къещтэри, музыкэ и лъэныкъуэкIэ абы бгъэдэлъ щытыкIэ къызэрымыкIуэхэр дегъэлъагъу. 
«Нобэр къыздэсым нарт пшыналъэхэм ящIэлъ музыкэр цIыхупсэ зылъэмыIэса щэху бзыщIауэ къе­кIуэкIащ, - жеIэ щIэныгъэлIым. - Япэ дыдэ зи щхьэ тетчыну дызыхуежьа уэрэдыжьхэм ящIэлъ макъамэхэмрэ ахэр зэрагъэзащIэ Iэмэпсымэхэм я гъэбзэкIэмрэ я деж жыжьэрэ гъунэгъуу щиухыркъым цIыху цIыкIум пасэ зэманым къыIэрыхьа тыгъэ телъыджэхэм я щапхъэу щыт нарт ­лIыхъужь эпосым щIэныгъэу къыбгъэдэпхыфынур». 
ТегъэщIапIэу къищтэр пасэрей адыгэхэм къащIэна нарт пшыналъэ­хэрауэ щытми, Ащхъуэтыр ­ялъо­Iэс абхъазхэм, осетинхэм, къэрэшейхэм балъкъэрхэм яхъумэ IуэрыIуа­тэми. И къэхутэныгъэхэм я пэжыпIэр зэры­зэхигъэкIыну гъуазэу щIэныгъэ­лIым я цIэ къреIуэ нарт эпосыр джынымкIэ пщIэшхуэ зиIэ Iуэры­Iуатэджхэу Бгъэ­жьнокъуэ Барэсбий, Гъут Iэдэм сымэ, абыхэм я Iуэху еплъыкIэр ­къегъэлъагъуэ. 
Тхылъыр нэхъ къеджэгъуафIэ ещI и Iыхьэ къэс цIыху цIэрыIуэ гуэрым къыбгъэдэкI Iущыгъэ псалъэпежьэу къазэрыхухихами. ГъэщIэгъуэнщ щIэныгъэлIым пшыналъэмрэ абы и гъэзэщIэкIэмрэ лъэпкъ хьэлым зэрырипхри. Ап­хуэ­дэхэм я щапхъэщ, псалъэм папщIэ, пхъэцIычым щытепсэлъыхькIэ, ар адыгэшым и лъэ макъыр уигу къэ­зыгъэкIыпхъэ макъамэу IуэрыIуатэм и кIыхьагъкIэ къызэрыпхыкIым гу зэрылъыдигъатэр. 
Макъамэ Iэмэпсымэхэр зи Iэпэ­гъу­хэм тхылъым и гуэдзэныр къа­хуэщ­хьэпэнущ. Абы тхылъеджэм къыщегъуэт зы нарт лIыхъужьым теухуа уэрэдыжьхэр кавказ лъэпкъ щхьэ­хуэхэм я щэнхабзэм зригъэува жыпхъэхэмрэ я нотэхэмрэ.

Чэрим Марианнэ.

Свежие номера газет Адыгэ псалъэ


19.02.2021
17.02.2021
15.02.2021
12.02.2021