Къэбэрдей-Балъкъэрым футболымкIэ и щIымахуэ чемпионатым и етIуанэ Iыхьэм щIидзащ. Командэхэм къапэщылъыжыр иджыри къэс ирагъэкIуэкIам нэхърэ нэхъ мащIэщ.
Зэхьэзэхуэм зэрыщIидзэрэ мазэрэ ныкъуэрэ дэкIауэ арами, ар къызытехьэлъэ хъуа командэхэм яхэту къыпщохъу. Армырамэ, дауэ къызэрыбгурыIуэнур щэбэт кIуам екIуэкIа зи чэзу джэгугъуэм Налшык и «Маисэмрэ» Къэбэрдей-Балъкъэр къэрал университетым и студентхэмрэ къызэрыримыхьэлIар. Я хьэрхуэрэгъуу щытын хуея «Тэрчымрэ» «Ислъэмеймрэ» елъытауэ, абыхэм гъуэгуанэ лей зэпачынутэкъым ди республикэм и къалащхьэм и къыдэлъэдапIэм деж щыIэ «ДыгъафIэ къалэ» еджапIэм и стадионым къэсын папщIэ. ЗэIущIэм къызэрымыкIуам къыхэкIыу ахэр 0:3-уэ къыхагъэщIауэ къалъытащ икIи я Iуэхухэр турнир таблицэм нэхъыкIэж щыхъуащ.
«Маисэмрэ» «КъБКъУ»-мрэ кIэух увыпIэхэр дэзыгуэш Налшык и «Ансар»-мрэ «Спартак-Д»-мрэ абы щыгъуэм бэнэныгъэ гуащIэ ирагъэкIуэкIащ. ЗэкIэ ехъулIэныгъэхэр яIакъым, топ зырызкIэ «Шэджэм-2»-мрэ «Мурбек»-мрэ къапикIуэтри, ауэ гува-щIэхами я ерыщагъым фIы гуэрхэр къахуихьын хуейщ.
Зэхьэзэхуэм и етIуанэ Iыхьэри текIуэныгъэкIэ иригъэжьащ Бахъсэн и «Автозапчасть»-м. «Бабугент»-м бжыгъэшхуэкIэ ефIэкIри, абы и пашэныгъэр нэхъри игъэбыдащ.
Бахъсэндэсхэм къакIэлъеIэ «Мурбек»-ри текIуащ. АрщхьэкIэ ар пашэм къызэрыкIэрыхур зэрыочкоиплIу къэнэжащ.
Ещанэ увыпIэр зэриIыгъщ «Малка»-м. Абы и пашэ ШащIэ Беслъэн иужь зэIущIэм Къэрэгъэш и «Иналым» топитI щыхудигъэкIащ икIи гъуащхьауэхэм я зэпеуэм бжьыпэр щиубыдащ. Мыгъэрей зэхьэзэхуэм ар 6 къыщыхэжаныкIащ. ШащIэм зы топкIэ къыкIэроху иджыри къэс пашэныгъэр зыIэщIэлъа «Ансар»-м и гъуащхьауэ Тамаев Аланрэ «Бабугент»-м щыджэгу Глашев Алимрэ.
Аргуэру и очко бжыгъэм зэрыхэхъуам и фIыгъэкIэ турнир таблицэм увыпIищкIэ зэуэ зыщиIэтащ «Тэрчым». Зэхьэзэхуэр гугъуу езыгъэжьа джылахъстэнейдэсхэр, илъэс къэси хуэдэу, медалхэм иджыри зэрыщIэбэнынум шэч хэлъкъым.
Фыщыдгъэгъуэзэнщ Къэбэрдей-Балъкъэрым футболымкIэ и щIымахуэ чемпионатым и зи чэзу джэгугъуэм кърикIуа бжыгъэхэм. Мис ахэр: «Ислъэмей» (Ислъэмей) - «Маисэ» (Налшык) - 3:0, «Кэнжэ» (Кэнжэ) - «ХьэтIохъущыкъуей» (ХьэтIохъущыкъуей) - 4:1, «Тэрч» (Тэрч) - «КъБКъУ» (Налшык) - 3:0, «Мурбек» (Налшык) - «Спартак-Д» (Налшык) - 2:1, «Автозапчасть» (Бахъсэн) - «Бабугент» (Бабугент) - 4:0, «Инал» (Къэрэгъэш) - «Малка» (Малкэ) - 2:4, «Шэджэм-2» (Шэджэм ЕтIуанэ) - «Ансар» (Налшык) - 1:0, «Шэрэдж» (Старэ Шэрэдж) - «Шагъдий» (Зеикъуэ) - 1:1.
КъыкIэлъыкIуэ джэгугъуэм «ДыгъафIэ къалэм» и стадионым щызэIущIэнущ: щэбэтым - «Маисэ» - «Шэрэдж», «КъБКъУ» -«Шэджэм-2», «Бабугент» - «Кэнжэ», «Шагъдий» - «Автозапчасть», «ХьэтIохъущыкъуей» - «Мурбек»; тхьэмахуэм - «Ансар» - «Инал», «Спартак-Д» - «Тэрч», «Малка» - «Ислъэмей» командэхэр.
.gif)
